LOR

Otolaringologiya – bu quloq, tomoq va burun kasalliklarini diagnostika qilish, davolash hamda oldini olish bilan shug‘ullanuvchi tibbiyot sohasi. Ushbu yo‘nalishda faoliyat yurituvchi shifokor otolaringolog yoki LOR shifokori deb ataladi.

Bugungi kunda otolaringologiya sohasi mutaxassislariga talab juda yuqori. Buning sababi shundaki, insonning og‘iz bo‘shlig‘i, quloqlari va burni o‘zaro bog‘langan bo‘lib, yagona tizimni tashkil etadi. Ushbu a’zolardan biridagi kasallik qolgan organlarga ham ta’sir qilib, kengroq yallig‘lanishga olib kelishi mumkin.

Eng keng tarqalgan LOR kasalliklaridan biri – bu burun oqishi yoki rinit bo‘lib, deyarli har bir inson hayotida bu holat bilan to‘qnash kelgan. Statistik ma’lumotlarga ko‘ra, odamlarning taxminan yarmida “surunkali vazomotor rinit” tashxisi uchraydi. Shuningdek, quloqning “otib” og‘rishi yoki tomoq og‘rig‘i hissini bilmaydigan odam kam bo‘lsa kerak.